طريقتي في الدراسة 2.....!!!!!

طــــريقـتـــي في الــدراســــــة 

مــن كـــتب المنتــــــسوري : 

في البداية كنت بقرا فهرس كل كتاب وقدرت تقريبا أرتب أفكاري وأعملي فهرس خاص بيا فيه الموضوعات مرتبة بالشكل اللي أنا شايفاه يعمل تسلسل مفيد : يعني  مثلا 

* السيرة الذاتية للدكتورة ماريا انا قعدت أدرس فيها شهور ليه ؟؟؟ عشان رجعت لكل الكتاب وعلماء النفس والتربويين وحتى علماء الطبيعة والنبات يعني كل شخص اتكلمت عنه وقالت انها اتأثرت بيه انا قريت عنه وكمان لو كان له كتب دورت عليها ونزلتها وحاولت أقراها سواء كنت بالانجليزية أو بالعربية ...
مثلا كتاب دكتور ايتارد وسيجون بالصدفة اتحصلت عليه من النت من عدة سنوات وح اتكلم عن التفاصيل اكتر في بوستات تانية ..

* وانتقلت من السيرة الذاتية لبيت الطفل اللي قامت هي بانشاؤه وجمعت كل المواد العلمية عنه سواء مكتوب او مسموع ومرئي واستفدت كتير جدا من ده لأنه كان بمثابة الدراسة التمهيدية لأسلوب المنتسوري 
وبعدين بديت أدرس الأدوات اللي استخدمتها برضو كل ده كان مجرد مقدمة 

*وبعدين بديت اجمع الأجزاء النظرية اللي في فهارس الكتب واجمعها كلها مع بعض كأني ح اكتب كتاب فمثلا : مراحل النمو جمعت كل حاجة اتكتبت عنها في كل كتاب 
وكذلك المراحل الحساسة وبديت اتنقل من نقطة لأخرى ... وبالطبع دراستي ماكانش مرجعها الكتب بس لكن أيضا النت وكان في كنوز مش عادية .. 

وكمان دراستي لم تقتصر على التعليم لمرحلة عمرية معينة ولكن أنا درست كويس كل اللي اتكلمت عنه منذ الولادة وحتى 3 سنوات - ومن سن 3:6 سنوات ومن 6:12 طول ماكنت ببتدي مرحلة بلاقي نفسي عندي نهم للمرحلة الثانية وهكذا 

طيب اكيد ممكن تكونوا بتسألوا طيب ليه ماعملتش الكورس ده من سنين فاتت او البلوج ده ... السبب اني بناتي كانوا في مراحل التعليم المهمة وحاليا كل واحدة فيهم بفضل الله في دراستها الجامعية وعرفت طريقها كويس واصبح عندي الوقت اللي ممكن اساهم بيه وأتمنى رب العالمين يقبل مني